No mes de febreiro tiveron lugar diferentes mobilizacións, tanto o 25 de febreiro no sur da provincia de Pontevedra como o 28 na Coruña e en Compostela. A situación no ensino é insostible.

É máis necesario que nunca realizar mobilizacións conxuntas, unitarias e transversais a toda a comunidade educativa.

Hai unhas semanas as Asembleas Abertas de Ensino e os sindicatos CIG-Ensino e STEG acordaron convocar en conxunto unha folga no ensino o próximo día 28 de abril. Ademais, neste acordo inclúese trasladar a todos os colectivos da comunidade educativa (asociacións, federacións, sindicatos, …) a proposta de realizar unha convocatoria conxunta e unitaria de mobilizacións descentralizadas de toda a comunidade educativa o mércores 6 de maio en máis de 20 vilas e cidades de toda Galicia, para defender o Ensino Público Galego desde unha ampla base social.

O pasado 24 de marzo en Compostela houbo unha primeira xuntanza previa e xeral entre as Asembleas Abertas do Ensino Público, sindicatos de profesorado e de estudantes, Federacións de ANPAs e outros colectivos para presentar esta proposta, e construír xuntas estas mobilizacións. Despois, volveuse enviar un correo electrónico a todos os colectivos para que poidan participar na convocatoria.

Queremos abrir espazos de debate en cada comarca, nos que compartir e aportar desde a perspectiva de todos os axentes de educación.

Por iso, estas semanas haberá asembleas comarcais abertas nas vilas e cidades onde se quere facer as mobilizacións. A idea é que nesas asembleas participen todas as persoas e todos os colectivos que o desexen: estudantado, familias, nais e pais, persoal non docente, profesorado… Soamente todas xuntas poderemos construír un Ensino Público Galego digno e de calidade.

Podedes atopar o calendario de asembleas abertas comarcais a continuación e cunha versión imprimible ao final:

A Coruña

• Compostela: mércores 8 ás 18:00. IES Eduardo Pondal (salón de actos).
• A Coruña (Culleredo): mércores 15 ás 18:00. Edificio Servizos Múltiples de Culleredo.
• Costa da Morte e Bergantiños (Carballo): mércores 15 ás 18:00. CEIP Bergantiños.
• Ferrolterra (Ferrol): mércores 15 ás 18:00. CEIP Ponzos (Biblioteca)
• Muros-Noia (Muros): xoves 16 ás 18:00. IES Fontexería.
• Porto do Son: luns 20 ás 20:00. Local social de Porto do Son.
• Barbanza: sen confirmar.

Lugo

• Monforte de Lemos: mércores 15 ás 18:00. IES Daviña Rey ás 18:00.
• Lugo: xoves 16 ás 18:00. IES Lucus Augusti (salón de actos).
• A Mariña (Ribadeo): mércores 22 ás 18:00. IES Dionisio Gamallo.

Ourense

• Allariz: mércores 8 ás 19:00, IES Allariz.
• O Carballiño: xoves 16 ás 17:30. IES Manuel Chamoso Lamas (Aula 6).
• Ourense: mércores 22 ás 18:00. CIFP Portovello (edificio B).
• Verín: martes 21 ás 18:00. IES García Barbón

Pontevedra

• O Condado-Paradanta (Ponteareas): mércores 15 ás 19:00. IES Val do Tea (Salón de actos).
• Vigo: mércores 15 ás 18:00. IES República Oriental do Uruguai (na Ágora).
• Deza-Tabeirós (A Estrada): xoves 16 ás 18:00. IES Manuel García Barros (Sala usos múltiples).
• Salnés (Cambados): mércores 22 ás 18:00. IES Ramón Cabanillas (PENDENTE DE CONFIRMACIÓN).
• O Morrazo (Cangas): mércores 22 ás 18:00. IES Rodeira (Sala usos múltiples).
• Val Miñor (Nigrán): mércores 22 ás 18:00. IES Val Miñor.
• Pazos-Redondela-Soutomaior-Vilaboa (Redondela): mércores 22 ás 18:00. Multiusos da Xunqueira de Redondela .
• A Louriña: xoves 23 ás 18:00. Lugar sen confirmar (actualizarase o luns 13 de abril).
• Pontevedra: xoves 23 ás 18:00. Centro Social Leste.

Mapa de asembleas abertas comarcais:

Ver o mapa a pantalla completa

Estas asembleas, xunto ás xuntanzas que se manterán a partir da próxima semana entre os distintos colectivos de toda a comunidade educativa que queiran participar na convocatoria das mobilizacións do 6 de maio, permitirán desenvolver unha convocatoria que responda ás necesidades e demandas de toda a comunidade educativa galega.

Loitando construímos o Ensino Público Galego!